By Dr. Cathy LO
係上星期二(22/2/22），我確診左COVID-19 。除左自己中左招外，身邊亦都有朋友中左打來問我點處理，所以今次想同大家分享一下如何在家自行處理OMICRON同來緊可以準備啲咩藥物傍身。利申： 巳經係一月份打齊打三針BIONTECH
1. 快速測試(RAT) -ve 係咪真係-ve ?
我可以好肯定同你講唔係。親身體驗，20/2/22 開始喉嚨劇痛，之後RAT-ve 照返左工，21/2同22/2做左三次全部都-ve，但係因為我屋企人係Close contact，所以我21/2唔放心留左個深喉唾液(DTS) PCR。22/2 返工第一件事就係check Result，CT Value 係15（ 數值愈低，病毒量愈高）。返到屋企我就搵晒全屋企有既牌子做多次，發現1個係positive, 1個係weakly positive, 1個都仲係Negative。自己又搵左D Paper睇，發現原來病發初期，RAT係好唔sensitive，要去到第4-7日先差唔多100% sensitive。除左我自己之外，身邊有啲朋友都係發晒高燒，燒左3日先RAT +ve 。我第六日再做多次RAT，做左三個牌子，呢個時候除左喉嚨痛，我仲有鼻水同咳同痰，全部1 分鐘內Positive 晒。
結論係咩？結論係如有感冒病徵，最好自己隔離，每日做RAT，擔心就去做個檢測/ DTS 。RAT +ve 可以當確診，但-ve 唔可以話真係無事因為做法同埋測試包嘅質素都好重要！(1)(2)
2. disease course 病程
每個人都唔同 ，所以我講下我自己同身邊既人既情況啦。我就打齊三針，無發燒。喉嚨痛痛左連埋今日係第7日 ，開頭四日係最痛，痛到好似比刀割咁，要round the clock 咁食喉糖同止痛藥，半夜係會痛醒，呢三日就變左吞口水先痛，咁大個女都無試過喉嚨痛咁耐。第2，3日有啲周身骨痛同全身無力，第4，5日先開始有少少鼻水同咳，食下藥就ok止到。我身邊有朋友淨係打左兩針，過左六個月未打第三針就連續發高燒，燒左三日食panadol 最高劑量都唔退，第四日先退燒。我屋企人就反而無我咁病，勁精神 ，一個打晒三針又係smoker，係得兩聲咳。。。。
結論： 病徵似重感冒咁，食下藥會舒緩到病徵，最好打埋第三針如果夠時間。
3. 藥物包
（註： 如果有藥物敏感病歷，最好查詢下自己既家庭醫生）
作為一個家庭醫生，屋企緊係有啲看門口藥啦，話明OMICRON似重感冒，所以我都係食返啲平時會開比病人食既感冒藥。以下建議只適用於無長期病健康既成人，如果有長期病患，請查詢自己既家庭醫。
- 止痛退燒藥可以揀paracetamol 500mg 每四個鐘一次
- 如果都退唔到可以加埋一隻消炎止痛退燒藥 ，可以揀 ibuprofen 200mg 每六個鐘一次；naproxen 250mg 每八個鐘一次； 由於消炎止痛退燒藥有機會傷胃，所以如果有試過胃潰瘍/胃出血既人士應盡量避免，同埋我一般會飽肚食，加埋胃藥 pepcidine 20mg 早晚一次就最穩陣
- 喉糖 ！！好重要，因為真心辛苦。我自己最鍾意食DIFFLAM，因為佢有少少局部麻醉成分，食完個喉嚨會痺痺地
- 收鼻水藥： Loratadine 10mg 一日一次 （唔眼瞓配方）； piriton 4mg 一日三次（眼瞓配方）
- 咳水 ：benadryl 10ml 一日三次(眼瞓配方）;phensedyl 10ml 一日三次(眼瞓配方)； actifed-co 10ml 一日三次（唔眼瞓配方) /其他自己買到既咳水
4. 如何係逆境中心情保持平伏
講真，又話打仗又話COVID19 大爆發，出街食個飯都好擔心會唔會中招，中左招之後惹到比身邊既人又點算，心理壓力都真係好大。呢排係門診，成日都見到啲病人情緒好低落同焦慮緊張，未中招都巳經搞到食唔安訓唔落，有個病人話我點解我可以係咁既環境之中都可以鬆容面對，其實我有三大絕招，全部都有研究證明有用
。
- 每日10-20 分鐘冥想（meditation) :好多研究巳經顯示meditation 有效減低焦慮同對抗抑鬱。我就用呢十幾分鐘既時候照顧返自己既內心，聆聽返自己身體同心靈既需要，巳經做左大半年啦！如果識聽英文既朋友，我會推介一個app 叫headspace ，佢有3-10分鐘既練習同唔同主題，好岩新手
如果真係無時間，做一分鐘五下深呼吸巳經好有用。吸氣五下，呼氣五下，雙手放係肚臍上面，感受下肚皮隨着呼吸嘅起伏，我成日都同啲病人喺診症室入面教佢地做，做完1分鐘到舒服好多！
- 做運動： 唔洗講大家都知帶氧運動係可以有效減低焦慮同對抗抑鬱，擔心疫情唔想出街，其實上youtube都可以搵到好多home exercise ga既選擇。我自己呢排home quarantine 就做緊coffee 同跳繩
- 感恩日記： 每日諗下有啲咩值得感恩 ，寫低佢就會發現原來好多野自己都忽略左，有既係唔覺得咁重要，到無左先發現。例子一就係健康啦～今次病左真心覺得健康係好重要，感恩可以有精神打咁多野同大家分享！
5. 最後，如果覺得氣促氣喘，發現身邊既人愈來愈無反應甚至昏迷，當然要即時去急症室做進一步診斷。如果病徵輕微，都建議大家在家自救，留係屋企係最穩陣，將急症室留比有需要既人士，我啲急症室同事照顧啲重症患者巳經忙到七彩。無打針既盡快去打針啦，尤其係老人家。60 歲以上又有長期病既人真係高危，死亡機會可以高達20% ，年紀愈大，風險愈高 ，對高危群組來講絕對唔係重感冒咁簡單！
係呢世紀大疫症，全世界人都同我地一樣經歷緊差唔多既野，好多人會有好多唔同既感受同唔同程度既焦慮，但你絕對唔係孤獨面對嫁，我哋一班醫護人員會同你一齊渡過呢個難關 ！香港人喎，獅子山精神，自強不息！
如果大家覺得我哋提供既資訊有用嘅話， 可以讚好同share呢個post 比朋友同屋企人，like呢個page ^^
確診後如何處理傳送門： https://www.coronavirus.gov.hk/pdf/pa_handbook.pdf
Reference
1. https://covid19-sciencetable.ca/.../use-of-rapid-antigen.../
2. https://link.springer.com/article/10.1007/s00430-022-00730-z
No comments:
Post a Comment